بأمرك /B2mrak/ عبارة، بالشامي

  1. «تكرم، اعتبرها صارت.»
  2. الكلمة اللي منقولها قبل ما يوصلك نظامك بشوي.

إنت بتقول الكلمة.
ونحنا منسلّم النظام.

منبني أنظمة لشغلك والذكاء الاصطناعي بقلبها، من النوع اللي بيشيل الشغل الروتيني عن فريقك، بيسرّع الشغل الحقيقي، وبيبيّن بخانة الربح. نسخة شغّالة بأيام، وبتجرّبها على راحتك قبل ما توافق على شي.

بلا عرض تقديمي. بلا مرحلة دراسة. بلا «منرجع منحكي».

أنظمة على الطلب

طلب رقم 00602/11

كول سنتر شركة توصيل

  1. انكتبت الفكرة
  2. أول نسخة شغّالة
  3. شغّال على رابط خاص
  4. النسخة التانية: فويسات، خريطة حيّة، ساعة الذروة
  5. نجحت التجارب، 35 من 35
  6. الرابط بإيد صاحب الشغل
الوقت كله
3 ساعات و25 دقيقة
عروض تقديمية
0
اجتماعات متابعة
0
أعذار
0

شكراً إلكن. شرّفونا مرة تانية.

سجل بناء حقيقي. زبون حقيقي. بنفس اليوم.

بالدليل

الحكي ما عليه جمرك.
نحنا محتفظين بالفواتير.

أي حدا فيه يقول «سريع». فهي الورق قدّامك: ستة أنظمة لستة أنواع شغل مختلفة، وكلها بشهر واحد. التواريخ والأوقات من سجلات البناء عنا متل ما هي.

  • +4,500طلب تمويل مرق بمسار واحد بنيناه
  • 380طلب مؤهّل من حملة إعلانية وحدة، بـ 22 يوم
  • 85%أقل بتكلفة الطلب، بعد تغيير خطة انعمل بنفس اليوم
  • أقل من يوملتسليم موقع. سلّمنا أكتر من عشرين

حرامية الوقت

الوقت من ذهب. وفريقك أغلى من إنو يصرفه على هيك شغل.

كل شغل فيه شغلات ما حدا توظّف مشانها: إعادة كتابة، ملاحقة، عدّ، وسؤال «في شي جديد؟». نحنا منحط ذكاء اصطناعي ونظام مرتّب جوّات الشغل، فهالشغلات بتمشي لحالها، وفريقك بيرجع للشغل اللي بيجيب مصاري. وكل اللي تحت من أنظمة نحنا بنيناها.

وقت ضايع أقل. شغل أكتر بيخلص. ومصاري أكتر بتضل بالجيبة.

شغلنا

اسأل مجرّب ولا تسأل حكيم.
13 نظام، وكلهن شغّالين.

مو تصاميم، ولا «أفكار مبدئية». 13 نظام شغّال، انبنوا لشغل حقيقي. كل واحد بلّش بمشكلة صاحب الشغل قالها بنَفَس واحد.

01شركة توصيلالموظفين ما بيمسكوا غير المحادثات اللي بدها إنسان.3 ساعات و25 دقيقة

المشكلة

تلات أطراف عم يراسلوا شركة التوصيل طول اليوم: الزبون اللي بدو يعرف وين صار عشاه، المطعم اللي الطلب جاهز عنده، والسائق اللي الزبون ما عم يرد عليه. ووقت الذروة الرسائل بتصير أكتر من الموظفين. بكتير.

شو بنينا

  • مساعد ذكي بيرد على التلاتة، وكل واحد بيشوف بس اللي بيخصه
  • بيفهم الرسائل الصوتية وبيكتب نصها، لأنو ما حدا بيكتب عالإشارة
  • بينسّق بين الكل: المطعم بيقول «جاهز»، فبيختار أقرب سائق فاضي وبيخبّر الزبون بالوقت
  • صلاحيات محدودة: بيلغي الطلب قبل ما يبلّش تحضيره، أو بيعطي كوبون اعتذار عن التأخير لحد سقف بتحطه الشركة
  • صندوق محادثات واحد للموظفين، وكل محادثة بتتحوّل بتوصل مع ملاحظة: مين، شو بدو، وشو انحكى

شو تغيّر

بتجربة ضغط فيها 30 محادثة بدقيقتين، المساعد سكّر 26 لحاله وحوّل 4 لموظفين مع الملاحظات. الموظف بيشوف بس المحادثات اللي بدها إنسان، والشركة بتشوف كم ساعة شغل توفّرت بكل شيفت.

جرّب النظام بإيدك

لقطات من الأنظمة الشغّالة نفسها. الأسماء والأرقام فيها تجريبية.

02تمويل عقاريمن دوّامة الجداول، لمسار بتسع مراحل.+4,500 طلب

المشكلة

طلب التمويل بيمرق بمراحل كتيرة قبل ما حدا يقول إي. ولما كانت المتابعة بالإيد، الطلبات كانت تنام. الزباين يتصلوا يسألوا «في شي جديد؟»، والإدارة ما شايفة شي.

شو بنينا

  • مسار بتسع مراحل، من أول مراجعة لحد الإغلاق، وكل ملف إله مسؤول
  • التقارير الائتمانية بيقراها النظام بدل ما يرجع يكتبها موظف تعبان
  • رسالة واتساب للزبون أول ما يتحرك ملفه
  • أرقام حيّة للإدارة: أداء الفريق ونسب الموافقة

شو تغيّر

أكتر من 4,500 طلب مرق فيه. كل طلب إله مسؤول معروف ومرحلة واضحة، وما حدا مضطر يسأل «في شي جديد؟».

03إعلانات بحث، لنفس شركة التمويلطلبين باليوم صاروا أربعين.380 بـ 22 يوم

المشكلة

شركة التمويل كان بدها طلبات حقيقية توصل للفريق كل يوم، وبدها تعرف أي إعلان وأي كلمة بحث جابت كل طلب. مو عدد كبسات. فواتير.

شو بنينا

  • حملة بحث بتودّي على صفحة تقديم مربوطة مباشرة بالمسار
  • 96% من الطلبات مربوطة بالكبسة وكلمة البحث اللي جابتها بالضبط
  • كلمات البحث اللي ما إلها علاقة انشالت قبل ما تاكل الميزانية
  • لما تغيّر الهدف وصار العدد، غيّرنا الخطة بنفس اليوم

شو تغيّر

380 طلب تمويل بـ 22 يوم، من طلبين باليوم بأول أسبوع لأكتر من 40 بأحسن الأيام. وتكلفة الطلب نزلت 85%.

04تأجير سياراتالفريق بيفتح اللابتوب على صفقات، مو على شغل متراكم.مبيعات 24/7

المشكلة

الاستفسارات كانت توصل بالليل وبالعطلة، والرد يستنى لصبح أول يوم دوام. ولوقتها بيكون الزبون استأجر من مكتب تاني.

شو بنينا

  • موظف ذكي على رقم واتساب الشركة نفسه، بالعربي والإنكليزي، وبيفهم الفويسات
  • الأسعار من النظام: السيارات المتوفرة فعلاً، بأسعارها الحقيقية، وبلا تخمين
  • بيحوّل للفريق بلحظة القرار، مع ملخص مكتوب
  • صاحب الشغل بيكتبلو «كيف كان شغلنا اليوم؟» وبترجعلو الأرقام

شو تغيّر

المحادثة بتوصل للفريق سخنة وجاهزة لتتسكّر، بدل ما توصل باردة تاني يوم الصبح.

05مقهى عمل مشتركصاحب المقهى بيشوف الصندوق وهو قاعد ببيته.3 أيام للتسليم

المشكلة

مقهى بيشتغل بالساعة: الزبون بيقعد بيشتغل وبيطلب مشروبات. صاحب المكان بدو الوقت ينحسب صح، والطلب يوصل من الطاولة بدون ما حدا ينده، ويعرف شو صار بالصندوق وهو مو موجود.

شو بنينا

  • QR على كل طاولة: بيطلب، بينده موظف أو بيطلب الحساب
  • الوقت بالدقيقة، والإيقاف ما بينحسب عالزبون
  • تذكرة المطبخ وفاتورة الزبون بينطبعوا لحالهن
  • اشتراكات للزباين الدائمين، وصندوقين لعملتين
  • تقارير بجمل واضحة، وملخص كل ليلة على تلفون صاحب المقهى

شو تغيّر

شغّال كل يوم من تشرين الأول 2026. صاحب المقهى بيعرف من تلفونه مين قاعد، شو انطلب، وشو دخل الصندوق. الطلبات لسا عم تجي، ونحنا لسا عم نضيف.

لقطات من الأنظمة الشغّالة نفسها. الأسماء والأرقام فيها تجريبية.

06مستودع أدويةعشرات الصيدليات بطّلت تتصل تسأل «وين صار طلبي؟».يوم واحد

المشكلة

مستودع بيبيع أدوية بالجملة لعشرات الصيدليات. الطلبات كانت توصل بالتلفون والورق، وتواريخ الصلاحية بدها عين ما بتغفل، والتلفون ما بيوقف رن.

شو بنينا

  • رابط خاص لكل صيدلية: بتشوف الأصناف، بتطلب، بتتابع طلبها وبتشوف رصيدها
  • الطلب بيتحضّر من الدفعة الأقرب لانتهاء الصلاحية، لحاله
  • لوحة توصيل: شو الجاهز، وكل سائق شو معه
  • توقيع عند التسليم، والكاش بيتسجّل بنفس اللحظة
  • المخزون بالدفعات وتواريخ الصلاحية، كشف حساب لكل صيدلية، واستيراد وتصدير Excel

شو تغيّر

الصيدلية بتطلب بأي وقت بدون اتصال. المستودع بيعرف شو لازم يتحضّر ومين معه شو. والمحاسب بيعرف مين عليه ومين دفع.

جرّب النظام بإيدك

لقطات من الأنظمة الشغّالة نفسها. الأسماء والأرقام فيها تجريبية.

07عيادة أسنانالطبيب بيستلم ملف حالة، مو محادثة طويلة عريضة.يوم واحد لنسخة بتنكبس

المشكلة

عيادة أسنان بتجيها استفسارات كتير عالواتساب، ومن مرضى بلغات مختلفة. قبل ما الطبيب يعطي خطة علاج لازم حدا يجمع الصور والمعلومات الطبية. وبعدها حدا لازم يتصل بالمريض. وبعدها حدا بينسى.

شو بنينا

  • مساعد بيرد بلغة المريض وبيجمع اللي بيحتاجه الطبيب
  • تذكير لطيف إذا سكت المريض. وبعدها بيوقف وما بيلحّ
  • صفحة مراجعة: ملخص الحالة، الصور، وقائمة تحقق بتفرجي شو الناقص
  • كبسة وحدة بتبعت الحالة للأطباء، وردّهن بيرجع مربوط فيها كعرض
  • لوحة اتصال: أول واحد بيستلم العرض بيصير إله، واللي ما حدا استلمه بيرجع للوحة

شو تغيّر

الطبيب بيقرا حالة وحدة مرتّبة. موظفين الاتصال ما بيتصلوا على نفس المريض مرتين. والإدارة بتشوف بالضبط وين عم توقف الحالات من أول رسالة لحد الحجز.

جرّب النظام بإيدك

لقطات من الأنظمة الشغّالة نفسها. الأسماء والأرقام فيها تجريبية.

08توزيع مستحضرات تجميلالمندوبين والمحاسب صاروا أخيراً يقروا من نفس الصفحة.مبيعات ميدانية + محاسبة

المشكلة

المندوبين بيزوروا العيادات، بيعرضوا البضاعة وبيتركوا عيّنات. ملاحظات الزيارات بمكان، والعيّنات بمكان تاني، والمخزون والفواتير بمكان تالت. ما حدا عنده الصورة كاملة، وكل مين عم يغنّي على ليلاه.

شو بنينا

  • تطبيق للمبيعات الميدانية: كل زيارة ومتابعة وعيّنة بتتسجّل، والمخزون بيتحدّث بنفس اللحظة
  • طلبات عروض الأسعار بتنبعت للمكتب من التطبيق نفسه
  • محاسبة كاملة: فواتير، مشتريات، مصاريف وحسابات بنكية
  • كشف حساب لكل زبون بكبسة وحدة بدل قعدة بعد الضهر كلها

شو تغيّر

المحاسبة بالإيد خلصت. فريق الميدان والمحاسب عم يشوفوا نفس الأرقام، لحظة بلحظة.

09مكتب سياحة وسفرربح كل رحلة، بدون كومة دفاتر.بنفس اليوم

المشكلة

حوالي عشر موظفين وأكتر من عشر وجهات. كل عيلة إلها حجوزات ودفعات وأوراق فيزا، الحساب ماشي بعملتين، والربح الحقيقي لكل رحلة كان بالتخمين.

شو بنينا

  • ملف لكل زبون: جوازه (مع تنبيه قبل ما يخلص)، عيلته، حجوزاته ودفعاته
  • ملفات الفيزا خطوة بخطوة، وتقويم للرحلات والدفعات
  • سعر واحد للباقة قدّام الزبون، مع فواتير وإيصالات مرقّمة
  • التكلفة بند ببند، وربح كل زبون وكل رحلة بيطلع لحاله
  • المدير بس بيشوف التكلفة والربح

شو تغيّر

المكتب بيعرف مين دافع ومين باقي عليه، وين صار كل ملف فيزا، وشو ربحت كل رحلة. طلبوا إضافات من أول يوم. وانعملت بأول يوم.

جرّب النظام بإيدك

لقطات من الأنظمة الشغّالة نفسها. الأسماء والأرقام فيها تجريبية.

10مكتب تصميم داخليمشروع واحد، بمكان واحد، ومعه الصور اللي بتثبت.من العرض للتسليم

المشكلة

مشروع التصميم فيه عروض أسعار، عقود، فواتير، طلبات للمتعهدين ومية شغلة صغيرة. وكل وحدة كانت عايشة بملف أو جدول أو مجموعة واتساب لحالها.

شو بنينا

  • عروض أسعار وعقود بلغتين، بصفحة كاملة وجاهزة للإرسال
  • فواتير مربوطة بدفعات العقد ومراحله
  • أوامر شغل للمتعهدين مع مواعيد التسليم وأديش اندفع
  • كل مهمة متابَعة لحد ما تخلص، مع صور قبل وبعد

شو تغيّر

الفريق كله بيشوف نفس المشروع بنفس المرحلة. والصور اللي بتثبت الشغل بتضل عالمهمة نفسها، بدل ما تضيع بمحادثة.

11تجارة مواد بناءالربح اليوم، مو المبيعات آخر الشهر.صافي الربح لحظة بلحظة

المشكلة

المبيعات ومشتريات الموردين ومصاريف كل يوم، كل وحدة كانت متابَعة لحالها. تعرف المبيعات كان سهل. تعرف الربح الفعلي، هلأ، ما كان سهل.

شو بنينا

  • أوامر شراء بتتحوّل لفواتير، والدفعات متابَعة لآخر قرش
  • أرصدة الموردين: المدفوع والباقي
  • حسابات الكاش والبنك مع كشوف كاملة
  • لوحة حيّة: المفوتر، المحصّل، المشتريات، المصاريف، وشو بقي

شو تغيّر

صاحب الشغل بيشوف صافي الربح لحظة بلحظة، وبطّل يستنى آخر الشهر ليعرف كيف كان الشهر.

12محل موبايلاتكل رصيد بيطابق قبل ما يسكّر المحل.يوم واحد

المشكلة

محل موبايلات فيه كذا شغلة بمكان واحد: رصيد لكذا شركة، إكسسوارات، أجهزة جديدة ومستعملة، شحن ألعاب، وصيانة. وآخر الليل لازم كل رصيد يطابق، وكل جهاز بالصيانة يكون معروف وين صار.

شو بنينا

  • شاشة سريعة لكل عملية رصيد، والرصيد بيتحدّث بعد كل حركة
  • الأجهزة برقم IMEI، والصيانة بتذكرة
  • رسالة «جهازك جاهز» بتوصل للزبون عالواتساب
  • مطابقة آخر النهار بين النظام وأرصدة الشركات
  • الموظف ما بيشوف سعر الشراء ولا الربح

شو تغيّر

وقت التسكير صاحب المحل بيعرف إذا كل رصيد مطابق، شو ربح كل قسم، وشو لازم يجيب بضاعة.

جرّب النظام بإيدك

لقطات من الأنظمة الشغّالة نفسها. الأسماء والأرقام فيها تجريبية.

13منصة عروض سفرالتنبيه بيوصل قبل ما يخلص العرض.مراقبة 24/7

المشكلة

نزلات أسعار درجة رجال الأعمال والدرجة الأولى بتختفي خلال ساعات. ومراقبة عشرات الخطوط على كذا شركة طيران كل يوم شغلة ما حدا بيتمناها.

شو بنينا

  • الخطوط ودرجات السفر مراقَبة ليل نهار، على كذا شركة طيران
  • تنبيه للمشتركين بنفس اللحظة اللي بينزل فيها سعر متابَع
  • اشتراكات بمستويات، حسب التغطية وعدد التنبيهات

شو تغيّر

بحث بالإيد كان بياخد دوام كامل، صار تنبيه بيوصل لحاله.

كيف منشتغل

خير الكلام ما قلّ ودلّ.

أربع خطوات. الأولى بتاخد منك قد ما بتاخد لتطلب بيتزا.

  1. 1

    اليوم

    بتحكيلنا شو اللي متعبك.

    سطرين بالإيميل أو عالواتساب. صورة من الدفتر، ملف Excel، اللوح، أي شي ماشي عليه شغلك هلأ. بلا ملف متطلبات، بلا طلب عروض رسمي، وبلا استمارة من أربعين سؤال. نحنا مو دائرة حكومية، وما حدا رح يقلّك «ناقصك ختم».

  2. 2

    بأيام

    منبنيه. عن جد.

    مو تصميم. نسخة شغّالة على رابط خاص، وفيها بيانات بتشبه شغلك. إي، قبل ما تدفع ولا قرش. عملناها مرة، وصاروا الكل يطلبوها. وعلى راسنا.

  3. 3

    القرار إلك

    التجربة أكبر برهان.

    اكبس على كل شي. جرّب تخرّبه. أعطيه لأكتر موظف مدقّق عندك. قلنا شو اللي مو مزبوط ومنصلّحه، وكتير مرات بنفس اليوم. وبس وقتها منحكي بالشغل والسعر، مكتوبين، قبل ما يبلّش الشغل الفعلي.

  4. 4

    ومن وقتها

    منضل معك.

    نحنا منشغّل اللي منبنيه: مراقبة، نسخ احتياطية، وتعديلات. إنت بتبعت رسالة، ونحنا منصلّح. هالقد بسيطة.

«طيب كيف هالقد سريع؟»

  • ما منبلّش من الصفر

    عنا مكوّنات جاهزة من شغلنا منعيد استعمالها. فالوقت بيروح على شغلك إنت، مو على اختراع شاشة تسجيل الدخول من جديد.

  • الذكاء الاصطناعي بيكتب. والتفكير علينا.

    كذا جزء بينبني بنفس الوقت، وبعدين منراجع كل شي قبل ما تشوفه.

  • ما في حدا «نرجعلو»

    اللي بيحكي معك هو اللي بيقرر. لا لجان، ولا سلسلة موافقات.

  • منجرّب قبل ما نحكي

    السرعة ما بتعني شغل ناقص. نظام التوصيل نجح بـ 35 تجربة من 35 قبل ما يوصل الرابط لصاحب الشغل.

للوكالات وأصحاب المشاريع

عندك زباينك؟
اعطِ الخبز لخبّازه.

المثل بيكمّل «ولو أكل نصّه»، بس نحنا ما مناكل شي. إنت عندك العلاقات، وشغل متراكم ما عندك مين يشتغله. ونحنا عنا مطبخ بيطلّع أنظمة شغّالة بأيام. إنت بتضل بالواجهة، ونحنا منطبخ.

  • إنت بتبيع. ونحنا منبني.

    باسمك أو باسمنا، متل ما بتحب. زبونك بياخد نظام شغّال بسرعة، والفضل بيرجع إلك.

  • منشتغل وإنت نايم

    إذا إنت بغير توقيت، نهارنا بيبلّش ونهارك عم يخلص. ابعت ملاحظاتك وإنت طالع من المكتب، وبتلاقيها خالصة مع أول فنجان قهوة.

  • لغتين، ومزبوطين

    عربي وإنكليزي، واليمين لليسار مزبوط متل ما لازم، والواتساب بالأساس. إذا زبونك بدو التنتين، نحنا غلطنا كل الغلطات من قبل، واسأل مجرّب.

خلّينا نحكي شغل

أجوبة صريحة

عند جهينة الخبر اليقين. اسأل الأسئلة المحرجة.

وين أراضيكن؟

بدبي، الإمارات العربية المتحدة. مسجّلين ومرخّصين هونيك باسم «بأمرك لخدمات تطوير الذكاء الاصطناعي»، رخصة رقم 1658086. الفريق موزّع بالمنطقة، وإذا كنت بعيد عنا ففرق التوقيت لصالحك: مساك هو صبحنا.

أكيد الموضوع فيه «إنّ». شو هي؟

ما في، ومنعرف إنو هاد بالضبط اللي بيقولو أي حدا مخبّي شي. إنت بتشوف نسخة شغّالة أول. إذا عجبتك، بتاخد الشغل والسعر مكتوبين قبل ما يبلّش أي شغل فعلي. وإذا ما عجبتك، منسلّم على بعض، وما خسرت غير كم إيميل.

بيقولوا «في العجلة الندامة». سريع ومنيح ورخيص، ما بيجتمعوا التلاتة، مو هيك؟

هالمثل انقال قبل ما الفرق الصغيرة تبني بالذكاء الاصطناعي وتعيد استعمال مكوّناتها. نحنا منجرّب قبل التسليم (35 من 35 بنظام التوصيل)، ومنشغّل اللي منبنيه، فإذا تعطّل الساعة 2 بالليل هي مشكلتنا، مو مشكلتك.

يعني شب واحد قاعد ورا لابتوب؟

لأ. فريق صغير، ومكوّنات من شغلنا منعيد استعمالها، والذكاء الاصطناعي هو اللي عم يكتب. والصغر مقصود: اللي بتحكي معه هو اللي بيقرر، وما حدا بيقلّك «لازم أرجع للإدارة».

وإذا ما عجبني الشغل؟

الصراحة راحة: بتقولها، ويا منصلّحه يا منسلّم على بعض. إنت شفت نسخة شغّالة قبل ما توافق على أي شي، فأسوأ الاحتمالات كم إيميل وقصة حلوة تحكيها.

أديش بيكلّف؟

حسب اللي بتطلبه. كل مشروع بيتسعّر بعد أول حكي، والرقم بيوصلك قبل ما يبلّش الشغل. منفضّل نسعّر مشكلتك إنت، مو نعلّق سعر واحد ما بيركب على حدا.

الذكاء الاصطناعي جاي ياخد شغل موظفيني؟

لا. قطع الأعناق ولا قطع الأرزاق. هو جاي ياخد الجزء اللي ما بيحبّوه من شغلهن: إعادة الكتابة، الملاحقة، العدّ والتلخيص. الذكاء الاصطناعي بيعمل الشغل المتعب، والناس بتاخد القرارات. بيشتغل ضمن حدود إنت بتحطها، وأي موظف فيه يشوف كل شي بيعمله ويلغيه.

نحنا مو شركة تقنية. الذكاء الاصطناعي إلنا أصلاً؟

إلكن قبل غيركن. شغّلناه بمقهى، ومحل موبايلات، ومستودع أدوية، وعيادة أسنان. ما حدا هنيك اضطر يتعلّم شي عن الذكاء الاصطناعي. بس انتبهوا إنو الورق بطّل يتكوّم.

وبعد التسليم؟ فصّ ملح وداب؟

لا. منضل نشغّله: مراقبة، نسخ احتياطية، وتعديلات. أغلب اللي بنيناه الشهر الماضي انضاف عليه من وقتها، وكتير من الإضافات انعملت بنفس اليوم اللي انطلبت فيه.

بتشتغلوا بالعربي بس؟

منشتغل باللغتين. أغلب اللي منسلّمه بلغتين، والذكاء الاصطناعي بيشتغل باللغة اللي بيستعملها فريقك وأوراقك. وإذا سوقك من اليسار لليمين بس، هاد النص الأسهل.

شغلنا ماشي على Excel ومجموعات الواتساب، وماشي الحال. ليش نغيّر؟

ماشي الحال لحد ما يكتر الشغل، ومو كل مرة بتسلم الجرّة. وقتها المتابعات بتفلت، تنين بيلحقوا نفس الزبون، وما حدا بيعرف وين صار الطلب بدون ما يقلّب المحادثات. نحنا ما منبدّل الشي الماشي. منسكّر الثغرة الوحدة اللي عم تكلّفك، ومنترك الباقي متل ما هو.

الكلمة إلك

العين بصيرة والإيد قصيرة؟

شايف شو لازم ينعمل بشغلك، وما عندك وقت تركض ورا شركات البرمجة؟ هيك توقعنا. ابعتلنا سطرين عن اللي متعبك. والباقي علينا، وأول شي بيوصلك منا بعدها رابط لشي شغّال.

hello@b2mrak.com+971 58 544 9828

بأمرك. اعتبرها صارت.